Утрото, во сабота 29 ноември 2025 година, на третиот ден од неговото апостолско патување во Турција, папата Лав XIV ја посети џамијата Султан Ахмед, позната и како „Сина џамија“.
Започнувајќи го својот трет ден во Турција на своето прво апостолско патување во странство, папата Лав XIV ја посети џамијата Султан Ахмед, позната и како „Сина џамија“.
„Папата ја посети џамијата во тишина, во дух на сеќавање и внимателно слушање, со длабоко почитување кон местото и кон верата на оние што се собираат таму на молитва“, соопшти Канцеларијата за печат на Светиот Престол.
Повеќе од 21.000 керамички плочки од Изник што ги обложуваат ѕидовите на зградата, претежно сини и тиркизни, ѝ го дале името на џамијата.
Една од најважните во Истанбул, оваа џамија била завршена во 1617 година од страна на султанот Ахмед I на дел од местото на Големиот дворец во Цариград.
Целта била оваа џамија да стане најзначајното место за богослужба во Отоманската империја. Осум тома, кои сега се чуваат во библиотеката Топкапи, ја документирале изградбата на џамијата.
Пристигнувајќи во џамијата во саботата наутро, папата Лав беше придружуван од министерот за култура и туризам, Мехмет Нури Ерсој; покраинскиот муфтија на Истанбул, Емрулах Тунџел; и имамот на џамијата Султан Ахмед, Кура Хафиз Фатих Каја.
Папата Лав има закажано разни средби и посети во текот на денот. По посетата на Сината џамија, тој ќе одржи приватна средба со водачите на локалните цркви и христијански заедници во Сириската православна црква Мор Ефрем.
Папата Лав станува третиот папа што ја посетува Сината џамија, следејќи ги стапките на неговите непосредни претходници Фрањо (во 2014 година) и Бенедикт XVI (во 2006 година). Посетата на Бенедикт беше втор пат во историјата Папа да посети џамија, по историската посета на Иван Павле II на џамијата Умајад во Дамаск за време на неговото апостолско патување во Сирија во 2001 година.
Потоа, во патријаршиската црква „Свети Георги“, Светиот Отец ќе се придружи на молитва заедно со Вселенскиот патријарх Вартоломеј I од Цариград.
Ватикан њуз/к.мк
