На празникот Пресвета Евхаристија, во парохиската црква „Раѓање на Свети Иван Крстител“, на 11 јуни 2026 година беше изложена Пресветата Евхаристиска Тајна за обожавање.
Евхаристиското обожавање започна во 12.00 часот, а заврши во 18.00 часот со евхаристиски благослов, а ги предводеше парохот, протојереј отец Гоце Костов.
Младите од парохијата и волонтери од Радио Марија ги предводеа молитвените накани кои беа принесени на Евхаристискиот Исус. Првиот час беше посветен на Црквата, папата Лав XIV, епископот Стојанов, свештенството, монашките заедници и црковните движења, со молитва Господ да им даде сила храбро, мудро и правоверно да го навестуваат Евангелието.
Потоа следуваа молитвени часови за парохиската заедница, за семејствата во криза, за децата и младите, за болните, осамените, старите и немоќните, како и за сите покојни, особено за починатите од семејствата и парохијата.
На крајот, младите и волонтерите кои беа во организацијата на Евхаристиското обожавање во дух на заедништво се дружеа во дворот на црквата.
к.мк
