„Оди! Фрањевска младинска средба“ започна овој понеделник во Асизи, собирајќи млади луѓе од цела Европа. Папата Лав XIV ќе ја посети средбата на 6 август, на завршниот ден од настанот. Брат Лука де Пасквале, италијански фрањевец и еден од организаторите, во интервју за Ватиканското радио објасни што можат да очекуваат младите во Асизи.
Најважниот момент за сите учесници несомнено ќе биде средбата со папата Лав XIV во четврток, во базиликата „Света Марија на Ангелите“, во долниот дел на Асизи, недалеку од железничката станица.
„Светиот Отец ќе пристигне доста рано наутро, на 6 август 2026 година. Настанот ќе се одржи во Света Марија на Ангелите, во долниот дел на Асизи. Тоа е големата базилика во која се наоѓа и Порцијункулата, малата црква што свети Фрањо од Асизи ја обновил, каде што живеел, го основал Редот на малите браќа и каде што починал. Во 8:45 часот Папата ќе се сретне со младите пред базиликата и ќе одговори на три прашања од учесниците. Потоа, во 9:15 часот, во манастирот ќе бидат примени претставници на Фрањевскиот ред, присутните епископи и членовите на Националниот комитет за 800-годишнината од смртта на свети Фрањо Асишки“, објасни брат Лука де Пасквале.
Порцијункулата, срце на фрањевското семејство
„Порцијункулата има посебно значење и за нашето фрањевско семејство и за годишнината од смртта на светецот, која сега ја одбележуваме како фрањевско семејство“, рече фратарот, еден од организаторите на „Оди! Фрањевска младинска средба“.
Триесет и осумгодишниот миноритски фратар објасни за ватиканските медиуми дека околу 2.150 млади луѓе директно се пријавиле за настанот. Средбата е наменета за млади на возраст од 18 до 33 години, и за верници и за неверници.
Поканети се и неверници
„Некои од нив ги прашавме: ‘Зошто доаѓате?’ Неколку млади луѓе одговорија: ‘Затоа што сакаме да направиме нешто поинакво, да пливаме против струјата и да се оддалечиме од модните трендови, предрасудите и површноста што, за жал, постојат денес.’ Тие доаѓаат затоа што се заинтересирани, иако мнозинството, секако, ќе бидат млади верници“, рече брат Лука.
Фрањевецот се надева дека и оние што не се верници, но се привлечени од ликот на свети Фрањо Асишки, ќе бидат збогатени од оваа средба.
„Гледајќи како Фрањо и понатаму привлекува луѓе надвор од религиските граници, бевме поттикнати да ризикуваме и да им се ставиме на располагање на оние што можеби се подготвени да излезат од своите предрасуди, да се свртат кон важните работи во животот и можеби да Го сретнат Господ. Не знаеме, но на тоа се надеваме, без да поставуваме никакви барања. Ако пораката на Фрањо допре до луѓето и младите од цела Европа, тоа сигурно би било најубавото нешто на кое можеме да се надеваме“, рече тој.
Работилници на различни теми
До посетата на Папата, младите учествуваат во различни работилници посветени на теми како економијата, мирот и грижата за создаденото, секогаш во врска со духовноста на свети Фрањо Асишки.
„Ќе учествуваат во работилници на различни теми. Таму младите нема само да слушаат, туку и активно ќе ги изразуваат своите мислења. Потоа ќе подготвиме еден вид резиме од нивните придонеси, за да развиеме повелба што ќе може да се примени во заедниците во Европа и пошироко, бидејќи откривме дека меѓу учесниците има и млади што доаѓаат надвор од европскиот континент. Сето тоа ќе кулминира во четврток наутро, со средбата со Папата“, објасни брат Лука.
Голема света Литургија со Папата
Полудневната посета на папата Лав XIV ќе заврши со голема света Литургија во 10:30 часот во базиликата „Света Марија на Ангелите“. На крајот од посетата, на Папата ќе му биде врачена и повелбата подготвена за време на работилниците.
Во интервјуто за Ватикан њуз, брат Лука де Пасквале нагласи колку е важно, особено за младите, да добијат насока за смислата на животот од некој како Папата, кој знае да гради мостови меѓу нив и исполнетиот живот што не секогаш лесно го разбираат.
Тој истакна и дека примерот на свети Фрањо може да им зборува на денешните млади како да им е современик.
Свети Фрањо Асишки привлекува и денес
„ Фрањо од Асизи ги фасцинира и привлекува луѓето. Она што е толку привлечно кај него е неговата едноставност и начинот на кој се допира до животот на младите луѓе, како да е еден од нив, како да им е врсник. Пред сè, тој секогаш бил голем сонувач и никогаш не се задоволувал само со она што го постигнал во животот“, рече брат Лука.
Според него, младите особено ги привлекува тоа што Фрањо не останал на површината.
„ Фрањо си ги поставил вистинските прашања, а тие му помогнале да го пронајде својот пат. Тој пат го довел до нов расцут на животот, односно до средба со Бога“, рече брат Лука де Пасквале.
Ватикан њуз/к.мк
