Посета на Шпанија: Папата го продолжува патувањето кон Барселона
Четвртиот ден од апостолското патување на папата Лав XIV во Шпанија го води во Каталонија. Претходно, за време на средбата со околу 80.000 католици на стадионот на Реал Мадрид, Папата ги благослови камен-темелниците за 17 нови цркви, а во катедралата во Мадрид ѝ ја подари Златната роза на Богородица од Алмудена.
За време на својата еднонеделна посета на Шпанија, папата Лав XIV во вторник ја завршува програмата во главниот град Мадрид и заминува за Барселона. Наутро, најпрво ќе се сретне со волонтерите кои помогнаа во организацијата на големата литургиска прослава во Мадрид, а потоа ќе отпатува за каталонската метропола.
Првата станица на Папата во Барселона ќе биде катедралата „Свети Крст и света Евлалија“, која не треба да се меша со светски познатата базилика „Саграда Фамилија“. Таму, напладне, папата Лав ќе предводи Литургија на Словото во присуство на надбискупот на Барселона, кардиналот Хуан Хозе Омела.
Во вторник вечерта ќе се одржи молитвена средба на Олимпискиот стадион „Луис Компањс“. Со внимание се очекува дали папата Лав XIV ќе упати и неколку зборови на каталонски јазик, кој, за разлика од шпанскиот, не го зборува течно.
Благослов на највисоката црковна кула во светот
Во среда, еден од врвните моменти од посетата на Папата на Шпанија ќе биде благословот на новоизградената централна Христова купа на базиликата „Саграда Фамилија“, висока 172,5 метри, која сега се смета за највисока црковна кула во светот.
Пред тоа, папата Лав ќе отслужи спомен-Света Литургија во светски познатата базилика, по повод 100-годишнината од смртта на нејзиниот архитект, Антони Гауди, кој живеел од 1852 до 1926 година.
Истиот ден, Папата ќе го посети и манастирот Монсерат, историско упориште на каталонскиот јазик и култура.
Златна роза за Богородица од Алмудена
Третиот ден од патувањето на папата Лав XIV во Шпанија заврши во понеделник вечерта со два официјални настапи во Мадрид. Најпрво, тој предводеше Литургија на Словото со маријанска побожност во катедралата „Алмудена“. Потоа се сретна со околу 80.000 католици од Мадридската надбискупија на стадионот „Сантијаго Бернабеу“, домот на фудбалскиот клуб Реал Мадрид.
За време на посетата на катедралата, Папата ѝ ја подари Златната роза, посебна папска почест за цркви посветени на Марија, на Богородица од Алмудена, која се почитува во катедралата на шпанскиот главен град.
Во присуство на кралицата Софија, 87-годишната мајка на кралот Фелипе VI, Папата во своето обраќање потсети дека илјадагодишната побожност кон Марија е знак на христијанските корени на Шпанија. Тој ги повика верниците да не ослабуваат во милосрдието, ниту во сведочењето на верата и христијанската надеж.
Средба со 80.000 верници на „Бернабеу“
На стадионот „Сантијаго Бернабеу“, средбата на Папата со свештенството и лаиците беше посветена на посебните предизвици што модерната метропола ги поставува пред пасторалната грижа и навестувањето на Евангелието.
Папата ги охрабри католиците во сè посложената општествена средина, повикувајќи ги различноста да не ја гледаат како проблем, туку како ресурс, и да ја живеат синодалноста во пракса.
Пред 80.000 луѓе, кои го поздравија со голем ентузијазам, папата Лав рече дека таа вечер сака да ги зајакне „односите на едно толку убаво црковно семејство“, кое „ја учи уметноста на полифонијата, односно единството во различноста“.
На присутните им се обрати и надбискупот на Мадрид, кардиналот Хозе Кобо Кано, кој ја истакна важноста на отворена Црква која, во време на поделби, оди во единство, слуша, разбира и дозволува да биде водена од Светиот Дух.
Нови почетоци во верата
Папата се осврна и на извештаите за растечки број крштевки, тренд што оди спротивно од намалувањето на бројот на католици во Шпанија, кои ја практикуваат верата.
„Верувајте во сè поочигледниот факт дека човек може да се врати на верата или да ја открие за првпат дури и во зрелоста. Бидете подготвени да ги прифатите новите почетоци не како исклучок, туку како правило на евангелизацијата“, рече папата Лав XIV.
На крајот од радосната прослава, исполнета со музика и бројни лични сведоштва што ја прикажаа разновидноста на животот и солидарноста на Црквата и нејзините верници, Папата ги благослови камен-темелниците за 17 нови цркви во населбите во развој на Мадрид.
Во претежно католичкиот Мадрид, Црквата веќе неколку години се соочува со намалена посетеност на богослужбите. Се намалува и бројот на црковни венчавки и крштевки. Сепак, со официјално католичко население од 79 проценти, Мадрид и понатаму останува едно од посилните црковни средишта во споредба со други европски метрополи.
Катпрес/к.мк
