Папата Лав XIV во понеделник вечерта, 7 септември 2026 година, повторно го посети светилиштето на Богородица на Добриот Совет во Џенацано, каде што служеше света Литургија во навечерието на празникот Рождество на Пресвета Богородица. Во својата проповед ги повика христијаните да ја созерцуваат присутноста на Марија и да станат служители на мирот.
„Да дозволиме мирот да расте во нас“, рече Папата во својата проповед за време на светата Литургија во августинското светилиште посветено на Богородица на Добриот Совет. „Тој ќе процвета во светот.“
Враќајќи се во светилиштето во Џенацано, југоисточно од Рим, папата Лав XIV потсети дека само неколку дена по својот избор за Папа, во мај 2025 година, почувствувал „голема желба“ да дојде токму таму. Тогаш рече дека Марија го придружувала низ целиот живот „со својата мајчинска присутност, со својата мудрост и со примерот на својата љубов кон својот Син, Синот Кој секогаш е во средиштето на мојата вера“.
Сега, славејќи го навечерието на раѓањето на Марија, Папата рече дека повторно ѝ го доверува на Богородица „она што сè уште се раѓа во ова сиромашно и величествено човештво: кревко како младо стебленце, но знак на Божјата верност“.
Марија и силата на нејзината присутност
Проповедта на Папата беше насочена кон привидниот парадокс на местото на Марија во историјата на спасението: жена чиј живот го променил текот на историјата, а сепак нејзината присутност во Евангелието е обележана со едноставност и тишина.
Осврнувајќи се на делата на свети Тома од Виљанова, августинец и епископ, папата Лав XIV праша зошто евангелистите даваат толку малку детали за раѓањето, детството и секојдневниот живот на Марија, иако таа има единствено место во историјата на спасението.
И самиот свети Тома се прашувал зошто евангелистите опширно пишувале за Иван Крстител и за апостолите, а толку малку кажале за Марија. Папата го цитираше неговото прашање: „Зошто, ве прашувам, со вашето молчење нè лишивте од толку голема радост?“
Но токму тоа молчење, рече Папата, им нуди важна поука на верниците.
„Ние, всушност, сме ‘сограѓани на светите и членови на Божјото семејство’“, рече тој, додавајќи дека Марија нè учи на мудрост што „разговара со Бога“, поставува прашања и ги чува настаните, слагајќи ги во своето срце.
Во евангелскиот текст според Матеј, прочитан на светата Литургија, Марија не зборува. Но нејзината присутност, заедно со присутноста на Христос во неа, е доволна за да го промени текот на настаните.
„Едноставната присутност на Марија, и на Синот во неа, ја придвижува целата историја“, рече папата Лав XIV.
Нејзината присутност ги менува очекувањата, одлуките и постапките на Јосиф, продолжи тој. „Во Марија, спасението наоѓа дом: Бог со нас!“
Божјиот пат е „поедноставен и потивок“
Потоа Папата се осврна на таинството што се слави во празникот на раѓањето на Марија.
„На тоа е невозможно да се навикнеме!“, рече тој. Се раѓа дете кое ќе стане „Мајка на својот Создател, Мајка на Бог Кој спасува“.
А сепак, забележа Папата, Марија се раѓа едноставно како дете, „како ќерките и внуките што ги држиме во раце“.
„За неа имаме благородни и возвишени титули, Госпоѓа и Царица“, рече тој, „но Божјиот пат бил и останува поедноставен и потивок, а сепак не помалку силен и преобразувачки.“
Истиот пат се открива и во Христос, продолжи Папата, истакнувајќи дека „во Исус Христос, Бог ги избра најскромните историски околности и најпонизните созданија за да ја покаже оригиналноста на Своето Царство, во кое нема место за надменост, а семоќта се изразува како создавање, служење и грижа за животот“.
Не фантазија, туку пророштво
Папата Лав XIV потоа повторно се наврати на повикот на свети Тома од Виљанова да ја созерцуваме Марија во својата внатрешност, иако Светото Писмо не ни дава детален опис на нејзиниот живот.
Свети Тома пишува дека Светиот Дух не ја опишал Марија во Писмото, туку „чекал ти да ја насликаш во себе“, потсети Папата.
„Во созерцателната молитва добива облик она што светот не ни го кажува, но веќе постои; она што сè уште е невидливо, но веќе поседува нов вид сила“, објасни тој. „Тоа не е фантазија, туку пророштво.“
Таквиот пророчки поглед, додаде Папата, е потребен „во време на уништување и неизвесност“, за христијаните да можат да го препознаат Божјото дело и да му служат.
„Да дозволиме мирот да расте во нас“
Од скриената сила на Марија, папата Лав XIV премина кон потребата од мир. Потсетувајќи на визијата на пророкот Михеј за Витлеем како место од кое ќе произлезе царот на мирот, тој го истакна библиското ветување и забележа дека молитвата на Литургијата за тој ден бара празнувањето на раѓањето на Марија да го зголеми мирот во верниците.
„Да, сакаме да го замислиме мирот, да ги прошириме границите на нашето разбирање и да го насликаме во нашите души, за да препознаеме дека тој веќе постои, да го примиме и да му служиме“, рече Папата.
Мирот, продолжи тој, е „Божји дар, здив на Воскреснатиот, дело на Светиот Дух“.
„Да дозволиме мирот да расте во нас“, рече папата Лав XIV. „Тој ќе процвета во светот. А Мајката на Добриот Совет ќе нè придружува во ова послание.“
Место блиско до срцето на папата Лав XIV
Папата Лав XIV има долгогодишна поврзаност со светилиштето во Џенацано. Првпат го посетил како млад студент во Рим, во раните 1980-ти години, а подоцна се враќал таму како генерален настојател на Августинскиот ред, како епископ на Чиклајо и потоа како кардинал. Неговата августинска провинција во Чикаго исто така е посветена на Богородица на Добриот Совет.
Неговата прва посета на светилиштето како Папа беше само два дена по неговиот избор, на 10 мај 2025 година. Пред да се појави на централната ложа на базиликата „Свети Петар“ на денот на изборот, тој се молел и пред иконата на Богородица на Добриот Совет во Паолинската капела на Апостолската палата.
Самото светилиште им е доверено на августинците уште од XIV век. Според преданието, на 25 април 1467 година, додека црквата сè уште била во изградба, на еден од нејзините ѕидови се појавила икона на Дева Марија. Двајца албански ходочесници подоцна ја препознале како иконата што се почитувала во Скадар, Албанија, а која исчезнала од своето првобитно место.
Иконата низ вековите привлекувала бројни ходочесници и повеќе Папи, меѓу кои Урбан VIII, Пиј IX, Иван XXIII и Иван Павле II. Продолжувајќи ја таа традиција, за време на посетата на папата Лав XIV на 7 септември во светилиштето беше откриена нова слика што го прикажува Папата како се моли пред Богородица на Добриот Совет.
Ватикан њуз/к.мк
