Папата Лав XIV ги повика експертите кои работат на ревизија на Декларацијата од Тајпеј на Светската медицинска асоцијација да ги зајакнат етичките заштитни мерки за здравствените бази на податоци и биобанките, нагласувајќи ја потребата од заштита на човековото достоинство во ерата на технологијата што брзо се развива.
Папата Лав XIV предупреди на опасноста поединците да бидат сведени само на податоци што можат да се искористуваат, повикувајќи на политики што ќе ги унапредуваат и приватноста и општото добро.
Во порака од 1 јуни 2026 година, Папата повика на посилни заштитни мерки за човековото достоинство при собирањето и користењето здравствени податоци. Тој предупреди на растечкиот ризик луѓето во дигиталното доба да бидат третирани како извори на информации погодни за искористување.
Пораката беше испратена до учесниците на Третиот отворен експертски состанок за ревизија на Декларацијата од Тајпеј на Светската медицинска асоцијација. Во неа, Папата ги истакна итните етички предизвици што ги носи брзиот технолошки развој.
Пораката беше упатена до надбискупот Ренцо Пегораро, претседател на Папската академија за живот, а во име на Папата ја потпиша кардиналот Пјетро Паролин, државен секретар.
Декларацијата од Тајпеј
Декларацијата од Тајпеј дава етички насоки за здравствените бази на податоци, биобанките и сродните медицински истражувања.
Додека експертите работат на ажурирање на документот во светлината на новите технологии и новите форми на собирање податоци, папата Лав ја нагласи важноста научниот и медицинскиот напредок да остане цврсто втемелен во почитувањето на човечката личност.
Нова форма на колонијализам
Осврнувајќи се на својата неодамнешна енциклика Magnifica humanitas, Папата истакна дека современото општество се соочува со, како што рече, „нова форма на колонијализам“, која настојува личните животи да ги претвори во податоци што можат да се искористуваат.
Тој предупреди дека постојаниот развој на технологијата ја прави сè поитна задачата за ревизија и зајакнување на заштитата на приватноста и безбедноста.
Вроденото достоинство на секоја личност
Папата Лав нагласи дека секој човек поседува вродено достоинство кое не може да се сведе на обична информација или на комерцијална вредност.
Создаден по слика и сличност Божја, секој поединец е „несводлива и единствена личност со непроценлива вредност“, рече тој во пораката. Поради тоа, продолжи Папата, општеството мора да се чува од облици на искористување и комерцијализација што ги третираат луѓето само како збирки на податоци.
Охрабрувајќи ги учесниците во нивната работа, папата Лав изрази надеж дека ревидираната Декларација од Тајпеј ќе продолжи да го почитува човековото достоинство, промовирајќи одговорно споделување на знаењето во служба на општото добро.
Тој нагласи дека почитувањето на човечката личност и унапредувањето на споделеното знаење треба да останат основа на етичкото медицинско истражување и на здравствените политики.
Ватикан њуз/к.мк
