За време на Литургијата во римската парохија „Воведение на Пресвета Богородица“, во недела 8 март 2026 година, папата Лав XIV упати силна порака до верниците во Третата недела од Великиот пост. Во својата проповед тој истакна дека средбата меѓу Исус и Самарјанката од Евангелието е слика на длабоката човечка жед за љубов, вистина и надеж, жед што само Бог може да ја угаси.
Во проповедта Светиот Отец потсети дека Великиот пост е време на духовно обновување и враќање кон благодатта на Крштението. Според него, евангелскиот настан за Самарјанката не им зборува само на верниците, туку ја открива и нивната сопствена духовна историја.
Папата нагласи дека жедта на жената кај кладенецот ја симболизира жедта на целото човештво, на Црквата и на светот, ранет од гревот, но во себе носи длабока желба за Бог. Човекот бара смисла, добро и љубов дури и тогаш кога не сфаќа дека, всушност, го бара токму Бог.
Светиот Отец потсети дека Исус ја среќава Самарјанката кај кладенецот напладне, во момент кога таа, најверојатно, се обидувала да ги избегне погледите на другите жени поради својот тежок живот. Но токму таму Христос ја очекува. Папата истакна дека ваквите неочекувани средби го откриваат „Бог на изненадувањата“, израз што често го користеше папата Фрањо.
„Живата вода“ што го менува животот
Во проповедта папата Лав XIV објасни дека Христос ѝ нуди на жената „жива вода“, како симбол на Божјото милосрдие и новиот живот што доаѓа од Бог. Таа вода ја гаси најдлабоката човечка жед и го преобразува човекот од оној што бара во извор на надеж за другите.
Според Папата, токму во средбата со Христос се случува вистинската промена: жената, која се чувствувала исклучена и засрамена, станува сведок и мисионер за луѓето од своето село. Од човек што дошол да бара вода, таа станува извор на вистина и радост.
Овој духовен пат, од средба до сведоштво, покажува како човек постепено го препознава вистинскиот идентитет на Христос: најпрво како човек, потоа како пророк, потоа како Месија и на крај како Спасител.
Крштението – изворот на новиот живот
Папата потсети дека преку Светата Тајна Крштение секој христијанин ја прима оваа „нова вода“, која ги очистува гревовите и го обновува животот. Великиот пост е време кога верниците се повикани повторно да го откријат овој дар и да се вратат на неговата благодат.
„Господ нè очекува таму каде што сме, и такви какви што сме“, рече Папата, нагласувајќи дека Божјото милосрдие ги исцелува човечките рани и го оспособува човекот да стане дар за другите.
Повик до парохијата: Црква што прима и исцелува
Обраќајќи се на парохиската заедница, папата Лав XIV призна дека подрачјето се соочува со многубројни општествени предизвици: сиромаштија, маргинализација и несигурност за младите. Тој предупреди дека многу тинејџери можат да бидат заведени од „продавачите на смрт“ или да ја изгубат надежта за иднината.
Светиот Отец нагласи дека токму во вакви ситуации Црквата треба да биде блиску со луѓето, особено на оние што се повредени, понижени или обесхрабрени. Според него, секоја парохија е повикана да биде место каде луѓето ја среќаваат милоста, разбирањето и поткрепата.
Папата ги охрабри верниците во центарот на животот на заедницата да ја постават Евхаристијата, „пулсирачкото срце“ на секоја христијанска заедница, и парохијата да ја направат духовен дом што прима, слуша и ги поддржува сите.
Надеж и мисија
На крајот од проповедта, папата Лав XIV ги повика верниците да продолжат напред со доверба, затоа што Христос секогаш оди со нив по патот на животот. Тој ја довери парохијата на закрилата на Дева Марија и им посака на сите да бидат „понизни и храбри сведоци на Евангелието“.
Ватикан њуз/к.мк
https://www.vaticannews.va/bg/pope/news/2026-03/papa-liturghia-vavedenie-bogorodichno-hristos-jiva-voda-krashten.html
