Папата за Адвентот: Подгответе се за Христовото доаѓање, не губете се во френетична активност
Во своите поздрави до верниците од различните јазични групи за време на Генералната аудиенција во среда, папата Лав XIV ја нагласиа важноста на Адвентот како време на подготовка, молитва и размислување, за да можеме да го дочекаме раѓањето Христово на Божиќ.
Додека ватиканската елка и Божиќната пештера го красат плоштадот „Свети Петар“ исполнет со верници, папата Лав XIV ја истакна важноста на Адвентот како време на подготовка за добредојде на Христовото раѓање.
Тој понуди охрабрување во своите различни поздрави до ходочесниците од различни јазични групи за време на Генералната аудиенција во среда на 17 декември.
„Се молам секој од вас и вашите семејства да доживеете благословен Адвент како подготовка за доаѓањето на новородениот Исус, Синот Божји и Спасител на светот“, им рече папата Лео на верниците што зборуваат англиски.
Важноста на Божиќната пештера
„Божиќ е за само неколку дена и замислувам дека во вашите домови се завршува или веќе е завршена Божиќната пештера, возбудлива претстава на Таинството на Христовото раѓање“, се осврна тој во својот поздрав до италијанските верници.
Во понеделник, на 15 декември, Ватикан ја откри Божиќната пештера на плоштадот „Свети Петар“ и во салата за аудиенција на Павле VI.
„Се надевам дека еден толку важен елемент, не само на нашата вера, туку и на христијанската култура и уметност, ќе продолжи да биде дел од Божиќ во спомен на Исус, кој, станувајќи човек, дојде „да живее меѓу нас“.“
Не губете се во френетична активност
Бидејќи Божиќ е за само една недела, тој ги охрабри верниците длабоко да го доживеат ова празнување и да не се одвлекуваат од други аспекти, поздравувајќи ги оние што зборуваат француски.
„Да внимаваме да не се зафатиме со френетична активност при подготовките за празникот, што би нè навело да го доживееме на површен начин и да оставиме простор за разочарување“, објасни тој. „Наместо тоа, да одвоиме време да ги направиме нашите срца внимателни и будни додека го чекаме Исус, за Неговото присуство полно со љубов да стане богатство на нашите животи и срца засекогаш.“
Во своите поздрави до германските поклоници, тој нагласи дека Адвентот „нè повикува да се подготвиме за Божиќ така што безрезервно ќе го пречекаме Исус“.
„Тој е нашата надеж. Затоа, радосно да го дочекаме празникот на неговото раѓање и заедно да се молиме со доверба: „Дојди, Господи Исусе““, рече Папата.
Време за размислување и молитва
Во своите поздрави до говорниците на полски јазик, тој повика последните денови од Адвентот да бидат време за размислување и молитва и за подготовка за доаѓањето на Христос преку Светата Тајна Исповед или духовни повлекувања.
Поздравувајќи ги верниците што зборуваат португалски, тој нагласи дека сега сме во периодот на Божиќната деветница, која започна во вторник и е „богата со традиции“ во некои од нивните заедници.
Тој додаде дека оваа побожност може да биде „за секого обновена можност да се разведри срцето, подготвувајќи го за претстојното раѓање на Синот Божји. Нека Богородица на надежта ве придружува во оваа побожност и секогаш нека ве заштитува вас и вашите семејства“.
„Христијаните се повикани да ги отворат своите срца за љубовта кон Бога и ближниот, за да бидат исполнети со вистински мир и радост“, поттикна Папата во својот поздрав до ходочесниците што зборуваат арапски.
Претстојни посети за пошироката јавност
Во среда, на 24 декември, нема да има Генерална аудиенција, бидејќи е Бадник.
Јубилејна аудиенција ќе има во сабота, на 20 декември, а следната Генерална аудиенција ќе се одржи на 31 декември, последниот ден од годината.
Последниот пат кога се одржа Генерална аудиенција на новогодишната ноќ беше пред 50 години во 1975 година, која ја одржа папата Свети Павле VI.
Ватикан њуз/к.мк
