Пораката на папата Фрањо за 39. Светскиот ден на млади, кој се одбележува на 24 ноември, носи наслов „Оние кои се надеваат на Господ, одат без умор“ и потсетува на темите на патувањето сфатени како ходочестие и надеж, се вели во соопштението за печат на Дикастеријата за мирјани, семејство и живот. Светиот Отец ги поттикнува младите денот посветен на нив да го прослават во нивните партикуларни Цркви, упатувајќи ги нашите очи и срца кон Светата година што е пред нас.
Откако 38. Светски ден на млади ги повика младите да бидат „радосни во надежта“, во пораката за 39. Светскиот ден на млади, кој оваа година ќе се одбележи во партикуларните Цркви ширум светот на празникот на Христос Цар на целото создание, во недела на 24 ноември, папата Фрањо за тема избра стих од Книгата на пророкот Исаија: „Оние кои се надеваат на Господа ќе одат и нема да се уморат“ (40,31), како да сака да го продолжи идејниот пат кон јубилејот во 2025 година. Папата потсетува на темите за патување, сфатено како ходочестие и надеж. Во објава на веб-страницата на Дикастеријата за мирјани, семејство и живот, се нагласува дека одењето и уморот се димензии кои го придружуваат искуството на оние кои одат на ходочестие, искуство обележано со предизвици, тешкотии, моменти на разочарување и бара цел што изгледа дека е далечна.
Појдете на пат како ходочесници
Во својата порака за Светскиот ден на млади во 2024 година, папата Фрањо ги охрабри младите да појдат на патување „не како туристи, туку како ходочесници, така што одењето – како што стои во соопштението, цитирајќи го Папата – не е само поминување низ местата на животот на површен начин, не забележувајќи ја убавината на она со што се среќаваат, без да го откријат значењето на поминатиот пат и да доловат кратки моменти, минливи искуства кои треба да се забележат со селфи. Ходочесникот – пишува Папата – целосно потонува во местата на кои се наоѓа, ги поттикнува да зборуваат, ги прави дел од својата потрага по среќа. Јубилејното ходочестие, значи, сака да стане знак на внатрешното патување на кое сите сме повикани за да стигнеме до крајната цел.
- Светски ден на млади насочен кон Светата година
Дикастеријата за мирјани, семејство и живот потоа објаснува дека папата Фрањо предлага три внатрешни ставови за да се подготви за патувањето: благодарност; барање; и покајание, поттикнувајќи ги младите да одат кон убавите животни цели, да одат, да се потат, да поднесуваат препреки и да се соочат со уморот, зашто конечната награда е прекрасна. Кризните времиња – охрабрува Папата – не се изгубени или бескорисни времиња, туку може да бидат многу важни можности за раст. Ова се моменти на прочистување на надежта – забележува Папата.
Затоа, Дикастеријата ги охрабрува младите луѓе и соработниците во пасторалот со млади да го одбележат 39. Светскиот ден на млади во партикуларните Цркви и, според зборовите на папата Фрањо, да се подготват за 24 ноември, со поглед и срца свртени кон јубилејот што е пред нас.
Ватикан њуз/к.мк
