Папата Лав XIV ќе се сретне со членовите на Кардиналскиот колегиум на 26 и 27 јуни, на вонреден конзисториум посветен на состојбата во Црквата и светот, стремежот за мир и спроведувањето на Синодата.
Канцеларијата за печат на Светиот Престол ја објави програмата за вонредниот конзисториум на кардиналите, закажан за 26 и 27 јуни, непосредно пред празникот на светите апостоли Петар и Павле.
За време на средбата со папата Лав XIV, кардиналите ќе разговараат за прашања поврзани со конфликтите што го потресуваат светот, како и за начинот на кој Црквата треба да комуницира — преку јазик, ставови и конкретно сведоштво — за да придонесе за мир и помирување.
Ова ќе биде второ вакво собирање на Конзисториумот во понтификатот на папата Лав XIV, по состанокот одржан во јануари, на кој учествуваа 170 кардинали, изборници и неизборници, од целиот свет.
На крајот од тој Конзисториум, Папата го најави јунскиот состанок, велејќи им на кардиналите: „Чувствувам и доживувам потреба да можам да сметам на вас“.
Според програмата објавена од Канцеларијата за печат на Светиот Престол, работата ќе се одвива според „синодален“ метод, со молитва, тишина, лично размислување, групни разговори и пленарни седници.
Од кардиналите е побарано да ја зачуваат доверливоста на разговорите во салата и да не даваат изјави за медиумите за време на Конзисториумот, со цел да се овозможи атмосфера на братска и слободна размена на мислења.
Четири сесии за размислување
Учесниците ќе бидат поделени во 20 групи. Девет групи ќе бидат составени од кардинали-изборници кои се ординари, вклучувајќи апостолски нунции и кардинали-изборници кои ја завршиле својата служба како ординари.
Останатите единаесет групи ќе вклучуваат кардинали-изборници од Римската курија и кардинали кои не се изборници.
Секоја група ќе има претседател, кој ќе ја модерира дискусијата и ќе го следи времето, како и секретар, кој ќе ги собира придонесите и ќе го подготви завршниот извештај на групата.
Конзисториумот ќе започне во петок, 26 јуни, со света Литургија во базиликата „Свети Петар“, која ќе ја предводи папата Лав XIV.
Потоа кардиналите ќе се преселат во салата „Павле VI“ за воведната сесија, која ќе започне со пеење на Veni Creator Spiritus, обраќање на кардиналот Џовани Батиста Ре, декан на Кардиналскиот колегиум, и воведен говор на Папата.
Првата сесија ќе се фокусира на прашањето: „Во каков свет сме повикани да го проповедаме Евангелието?“ Кардиналот Гжегож Риш, митрополит надбискуп на Краков, ќе понуди библиска медитација, по што ќе следуваат тишина, молитва, групно споделување и извештаи на пленарна седница.
Во петок попладне, втората сесија ќе биде посветена на темата „Културата на моќта и цивилизацијата на љубовта“. Кардиналот Виктор Мануел Фернандез, префект на Дикастеријата за наука на верата, ќе ја претстави темата, потпирајќи се на петтото поглавје од Magnifica humanitas.
Градење на општото добро
Во сабота наутро, по светата Литургија во базиликата „Свети Петар“, која ќе ја предводи кардиналот Ре, кардиналите ќе ја продолжат својата работа во салата „Павле VI“.
Третата сесија, насловена „Градење во доброто: градилиштата на нашето време“, ќе ја воведе кардиналот Стивен Брислин, митрополит надбискуп на Јоханесбург и претседател на Конференцијата на католичките бискупи на Јужна Африка.
Разговорот ќе се фокусира на поделбите што го отежнуваат градењето на општото добро, на прашањата што произлегуваат од луѓето и заедниците, како и на поддршката што можат да ја понудат локалните Цркви и универзалната Црква.
Четвртата и последна сесија ќе се одржи во сабота попладне во Новата синодална сала и ќе биде посветена на „Патот на спроведување на Синодот“.
Кардиналот Марио Грех, генерален секретар на Синодата, ќе ја претстави темата, тргнувајќи од документот „Кон синодалните собранија 2027-2028: фази, критериуми и инструменти за подготовка“.
Сесијата ќе вклучува прашања за појаснување, дијалог со папата Лав XIV и слободни интервенции, со времетраење не подолго од три минути.
Заклучното обраќање на Папата ќе го заврши Конзисториумот, по што ќе следува пеење на Te Deum и вечера со Папата во салата „Павле VI“.
Во понеделник, 29 јуни, папата Лав XIV ќе предводи света Литургија во базиликата „Свети Петар“ по повод празникот на светите апостоли Петар и Павле.
Ватикан њуз/к.мк
