За време на светата Литургија на празникот Сите светци, која воедно е и кулминација на Јубилејот на светот на образованието, папата Лав XIV го прогласи Свети Џон Хенри Њуман за Научител на Црквата. Неговото наследство, нагласи Папата, е да ги обликува луѓето „за да можат да светат како ѕвезди во своето целосно достоинство“.
Папата Лав XIV го претстави Свети Џон Хенри Њуман како мајстор на „теоријата и практиката на образованието“, кој нè повикува да ја понудиме „Љубезната светлина“ на верата во Промислата – како што стои во неговата позната химна – за да ги „разоружаме лажните причини за резигнација и немоќ“ и да пренесеме „светлина и водство“ во ова сегашно време, „затемнето од толку многу неправда и неизвесност“. Обраќајќи се пред илјадниците верници – особено студенти и воспитувачи – собрани на плоштадот Свети Петар, Папата ги повика „да осигурат дека училиштата, универзитетите и секој образовен контекст, дури и оние што се неформални или улични, секогаш ќе бидат порти за цивилизација на дијалог и мир“.
Во центарот на образованието, вистински луѓе
Во присуство на официјалната делегација на Англиканската црква предводена од надбискупот на Јорк, Стивен Котрел, Папата во својата проповед потсети дека новиот Научител на Црквата – триесет и осми – ни остави, особено во своите Медитации и Молитви, прекрасни размислувања за „достоинството на секоја човечка личност, а исто така и за разновидноста на даровите што ги дава Бог“. Животот, рече Папата, станува прозрачен кога некој открива, како што откри кардиналот Њуман, дека има повик – послание – и дека „нашите животи служат а нешто поголемо од нас самите“. Придонесот што секој од нас може да го понуди, додаде тој, „е единствено вреден, а задачата на образовните заедници е да го поттикнат и негуваат тој придонес“.
„Да не заборавиме дека во срцето на образовното патување не наоѓаме апстрактни поединци, туку вистински луѓе, особено оние кои изгледаат дека не се доволни според параметрите на економиите што ги исклучуваат или дури и ги убиваат. Повикани сме да ги формираме луѓето, за да можат да светат како ѕвезди во своето целосно достоинство.]“
Кардиналот Њуман ги вдахновува новите генерации
На почетокот на проповедта, Лав XIV објави и дека Свети Џон Хенри Њуман е именуван за ко-покровител на образовната мисија на Црквата заедно со Свети Тома Аквински.
Импресивниот духовен и културен углед на кардиналот Њуман, продолжи Папата, „сигурно ќе послужи како вдахновение за новите генерации чии срца жеднеат за бесконечното и кои, преку истражување и знаење, се подготвени да го преземат тоа патување кое, води per aspera ad astra , низ тешкотии до ѕвездите“.
Образованието како потрага по вистината и служењето
Размислувајќи за Посланието на Свети Павле до Филипјаните и апостолскиот повик да „светат како ѕвезди во светот“, Папата на воспитувачите им ги повтори зборовите од својата Апостолски поттикDilexi te.
„Сјајте денес како ѕвезди во светот“ преку вашата автентична посветеност на колективното барање на вистината и на нејзиното споделување со великодушност и интегритет. Всушност, вие го правите тоа преку вашето служење на младите луѓе, особено на сиромашните, и вашето секојдневно сведоштво за фактот дека „христијанската љубов е пророчка: таа прави чуда“
Универзитетите како лаборатории на пророштво
Папата Лав потврди дека, во рамките на Јубилејот сфатен како ходочестие на надежта, образованието претставува „неопходно семе“ на надежта.
„Кога размислувам за училиштата и универзитетите, ги сметам за лаборатории на пророштво, каде што се живее надежта, каде што постојано се дискутира и се охрабрува“
Училиштата како места за слушање и живеење на Евангелието
Коментирајќи ги блаженствата штотуку прочитани од Евангелието според Матеј, Папата ги опиша како „пат и порака на Исус Учителот“, кој – спротивно на логиката на светот – ги прогласува за блажени сиромашните, оние кои гладуваат и жеднеа за правда, прогонуваните и миротворците. Ова, рече тој, се знаците на Царството Божјо, кое светците го претставуваат меѓу нас.
„Ние сме негови ученици и сме во неговото „училиште“. Учиме како да откриеме во неговиот живот, имено на патот што го поминал, хоризонт на значење способен да ги осветли сите форми на знаење. Нашите училишта и универзитети секогаш нека бидат места за слушање на Евангелието и негово спроведување во пракса!“
Ослободување на човештвото од темнината на нихилизмот
Лав XIV призна дека ваквите предизвици може да изгледаат дека се над нашите сили, но, цитирајќи го папата Фрањо, тој повика на упорност.
„Мораме да работиме заедно за да го ослободиме човештвото од мракот на нихилизмот што го опкружува, што е можеби најопасната болест на современата култура, бидејќи се заканува да ја „откаже“ надежта.“
Водени од „Љубезната светлина“
Оваа темнина, рече Папата, потсетува на химната на кардиналот Њуман „Води, љубезно светло“, компонирана кога тој сè уште бил англикански пастор. Тоа е светлина што нè води кога сфаќаме дека нашите нозе се нестабилни, неспособни да го распознаат хоризонтот. Задачата на образованието, објасни Папата, е токму да им ја понуди оваа љубезна светлина на оние што се затворени од „сенките на песимизмот и стравот“.
„Во таа прекрасна молитва, сфаќаме дека сме далеку од дома, нашите нозе се нестабилни, не можеме јасно да го протолкуваме патот напред. Сепак, ништо од ова не нè спречува, бидејќи го најдовме нашиот Водич: „Води, љубезна Светлино, среде околниот мрак, Води“ „Води, љубезна Светлино, Ноќта е темна, а јас сум далеку од дома, Води ме.“
Католичко образование и откривање на светоста
Папата ја заврши својата проповед нагласувајќи дека „од христијанска перспектива, образованието им помага на сите да станат светци. Тој потсети на зборовите на папата Бенедикт XVI до младите за време на беатификацијата на Њуман во Велика Британија во 2010 година: „Она што Бог најмногу го сака за секој од вас е да станете свети. Тој ве сака многу повеќе отколку што можете да замислите“. Ова, потврди Лав XIV, е универзалниот повик за светост – суштинската порака на Вториот ватикански собор – „лично и заедничко патување обележано со блаженствата“.
„Се молам католичкото образование да му помогне на секој човек да го открие својот повик за светост. Свети Августин, кого Свети Џон Хенри Њуман многу го почитувал, еднаш рекол дека ние сме соученици кои имаат еден Учител, чие училиште е на земјата, а чија катедра е на небото“
Ватикан њуз/к.мк
