За време на кратката посета на парохијата Света Тереза во Хуанико, Монтевидео, папата Лав XIV ги поздрави верниците и ги охрабри да препознаат дека Божјата благодат и љубов „се секогаш со нас“. Тој потсети и на посебната почит што неговото семејство ја негувало кон Света Тереза.
Во неделата наутро, 8 ноември 2026 година, папата Лав XIV ги посети верниците од парохијата Света Тереза во Хуанико, Монтевидео, и им ја изрази својата близина.
„Можеби не го знаете ова, но навистина сум многу среќен што можам да го споделам овој краток момент со вас во парохијата Света Тереза. Ова е првата парохија во Уругвај што ѝ била посветена по нејзината канонизација“, рече Светиот Отец.
За време на посетата на Хуанико, Папата влезе во парохиската црква и помина неколку моменти во молитва и тишина, а потоа ги поздрави околу 2.000 верници собрани во парохискиот двор.
Папата сподели и едно лично сеќавање поврзано со почитта што неговото семејство ја негувало кон светицата заштитничка на парохијата.
Посебната почит на семејството Превост кон Света Тереза
„Во моето семејство, особено мојот татко, имавме голема почит кон Света Тереза“, рече Папата.
Папата Лав беше на пат кон градот Флорида, каде требаше да служи света Литургија по повод празникот на Пресвета Богородица на Триесет и Тројцата, со што завршува неговата апостолска посета на Уругвај.
Во своето кратко обраќање тој потсети дека Бог постојано е близу до нас.
„Ова е момент на побожност, момент на благодарност и момент во кој треба да препознаеме дека Божјата благодат и Божјата љубов се секогаш со нас и дека Бог нè придружува во секој миг“, рече Папата.
Тој нагласи дека Божјата близина останува со нас „и во радосните моменти и кога страдаме, кога минуваме низ болест, болка или многу други тешкотии“.
Да ја живееме верата храбро
Пред да замине, Светиот Отец им го подели својот благослов на верниците.
„Да Го молиме Господ да го благослови секој од вас и вашите семејства. Оние што донесоа бројаници или други побожни предмети, во овој момент ги благословуваме и нив“, рече Папата.
На крајот, папата Лав ги повика сите да Го молат Господ „да ни помогне да растеме во верата, храбро да ја живееме нашата вера и да не се плашиме да кажеме ‘Јас сум христијанин, јас сум католик, верувам во Исус Христос’“.
„Исус ни го дарува животот и нè учи како да живееме, служејќи им на другите, одејќи заедно во единство, барајќи го Божјото присуство и споделувајќи ја со сите радоста што произлегува од тоа да се биде христијанин“, рече папата Лав XIV.
Ватикан њуз/к.мк
