Папата Лав XIV го започна своето прво апостолско патување надвор од Италија со посети на Турција и Либан. Во папскиот авион се сретна со над 80 новинари, им го честиташе Денот на благодарноста и нагласи дека неговата мисија е насочена кон промовирање на мирот, единството и меѓурелигискиот дијалог.
Во авионот за Анкара, папата Лав XIV ги поздрави повеќе од 80 новинари што го придружуваа на неговото прво апостолско патување во Турција и Либан. Со насмевка и желби „Среќен Ден на благодарноста“ до американските новинари. „Ова е прекрасен ден за прослава и сакам да почнам со тоа што ќе се заблагодарам на сите вас за вашето служење на Ватикан, на Светиот Престол и мене лично, но и на целиот свет“, им рече тој на повеќе од 80 новинари на летот за Анкара, првата станица од неговото прво апостолско патување, кое ќе го однесе во Турција и Либан од 27 ноември до 2 декември. Светиот Отец ја нагласи важната улога на медиумите во пренесувањето на „вистината и хармонијата кои му се потребни на светот“.
Папата истакна дека ова патување има посебно значење бидејќи ја одбележува 1700-годишнината од Првиот Вселенски собор во Никеја, симбол на христијанското единство. Тој нагласи дека присуството на Црквата во Турција и Либан е повик за мир, братство и дијалог меѓу народите и религиите.
Средбата во авионот се одржа во топла и неформална атмосфера. Новинари од различни земји му подарија симболични подароци – пита од тиква и чорапи од неговиот омилен бејзбол тим, Чикаго Вајт Сокс, а друг новинар му подари бејзбол палка – семеен предмет што ѝ припаѓал на Нели Фокс, позната американска играчка од 1950-тите. „Како ова го помина обезбедувањето?“, се пошегува папата Лав XIV. Папата, исто така, со благодарност прифати писмо од 15-годишно момче кое го запознал за време на Јубилејот на младите и кое моментално се лекува во детската болница на Светиот Престол.
По краткиот лет, папскиот авион слета во Анкара во 12:22 часот по локално време. По официјалната церемонија на аеродромот, следеше посета на Мавзолејот на Ататурк и средба со претседателот Реџеп Таип Ердоган. Подоцна во текот на денот, Папата продолжи кон Истанбул.
Мотото на патувањето – „Еден Господ, една вера, едно крштевање“ – го нагласува стремежот за мостови меѓу Исток и Запад, како и за мирен соживот меѓу религиите и културите.
Ватикан њуз/к.мк
