Во катехезата на генералната аудиенција во среда на 16 октомври, папата Фрањо истакна дека Светиот Дух ни нуди вечен живот и дека помислата за него, заедно со цврстата вера, нè ослободува од ужасот да размислуваме дека сè завршува со смртта. На крајот од аудиенцијата ги спомена земјите погодени од војна: Украина, Палестина, Израел, Мјанмар и повторно поттикна да не заборавиме дека војната е секогаш пораз
И да не ги заборавиме земјите зафатени од војна. Да не заборавиме на маченичката Украина, Палестина, Израел, Мјанмар. Браќа и сестри, да не заборавиме дека војната е секогаш, секогаш, пораз. Да не го заборавиме тоа и да молиме за мир и да се бориме за мирот.
Ова е пораката на папата Фрањо на самиот крај од редовната генерална аудиенција во среда, која ја започна со катехеза и размислување за Светиот Дух и неговото присуство и делување во животот на Црквата. Тој потсети, пред сè, на првите три века кога немало потреба од каква било експлицитна формулација за верата во Светиот Дух.
Во најстариот апостолски символ на верата – објасни тој – се додава дека „Верувам во Светиот Дух“, без никакво дополнително објаснување, но ерес ја поттикна Црквата сепак да го прецизира. Во 381 година, на Вселенскиот собор во Константинопол, го дефинира божеството на Светиот Дух како „Господ, Кој создава живот; кој излегува од Отецот и Синот, на Кого Му се поклонуваме и Го славиме заедно со Отецот и Синот и кој зборувал преку пророците. Папата за тоа рече:
Да се каже дека Светиот Дух е „Господ“, во суштина е исто како да се каже дека Тој го дели Божјото „господство“, кое му припаѓа на Создателот на светот, а не на светот на созданијата. Најсилната изјава е дека нему му доликува истата слава и поклонување како на Отецот и на Синот. Тоа е аргумент за еднаквост во честа, драги свети Василиј Велики, кој беше главниот творец на таа формулација.
Тој објасни и дека оваа дефиниција е почетна точка за понатаму. И кога ќе се отстранат историските причини кои ја спречуваа потврдата на божественоста на Светиот Дух, ќе започне да се навестува во богослужбите и теологијата.
Тој исто така рече дека Западната црква изјавата дека Светиот Дух, Кој „излегува од Отецот“ ја дополнила со зборовите „и од Синот“. Тоа предизвика спор кој пак придонесе за други спорови и поделби меѓу Црквата на Исток и Црквата на Запад, но денес во атмосферата на дијалог ја изгуби таа острина и ни овозможува да се надеваме на целосно меѓусебно прифаќање, рече Папата и го привлече вниманието на најважната одредница на Светиот Дух во символот на верата, а тоа е дека Тој е „животворец“ – дека создава живот.
Каде во сето ова е големата и утешна вест за нас? Во тоа што животот што ни го дава Светиот Дух е вечен живот! Верата нè ослободува од ужасот на сознанието дека сè завршува тука, дека нема избавување од канџите на страдањата и неправдите кои суверено владеат со земјата.
Таа вера – заклучи папата Фрањо – ја негуваме за оние кои често не по своја вина ја немаат и не успеваат да најдат смисла во својот живот. И да не заборавиме да му се заблагодариме на Оној кој преку својата смрт ни го подари тој непроценлив дар!
Ватикан њуз/к.мк
