На празникот на светите Петар и Павле Папата ги повика новите надбискупи да бидат добри пастири на празникот на светите Петар и Павле
За време на светата Литургија на празникот на светите апостоли Петар и Павле, папата Лав XIV ги повика верниците да се вдахноват од двајцата заштитници на Рим, кои и покрај своите слабости станале извонредни сведоци на Евангелието. Тој ги повика и новите митрополитски надбискупи, кои го примија палиумот, да Го следат Господовиот пример и да бидат добри пастири на верниците што им се доверени.
„Важно е денес да погледнеме кон овие двајца светци, Петар и Павле, за да сфатиме како и ние можеме да бидеме апостоли и градители на единство, како и великодушни слуги на вистината во љубовта.“
Ова потсетување го упати папата Лав XIV за време на светата Литургија во базиликата „Свети Петар“, која ја предводеше во понеделник наутро, 29 јуни 2026 година, на празникот на светите Петар и Павле, заштитници на Рим.
За време на светата Литургија се одржа традиционалниот благослов и полагање на палиумот на новите митрополитски надбискупи.
Два столба на Црквата
Во својата проповед, Светиот Отец размислуваше за светите заштитници на градот и на Римската бискупија, потсетувајќи дека Петар бил избран од Исус за пастир на Неговото стадо, а Павле за апостол на народите.
„Во нив“, рече Папата, „почитуваме два столба на Црквата.“
Најнапред осврнувајќи се на Петар, Папата потсети дека првиот папа го поттикнувал единството и заедништвото дури и во време на поделби и немири.
Петар не бил совршен
Сепак, оваа великодушност, забележа папата Лав, не значи дека Петар бил совршен.
Папата потсети дека за време на Господовите страдања, Петар се откажал од Учителот, а дури подоцна пролил искрени солзи на покајание. И самиот Павле, во други околности, го укорил Петар поради недоследноста во некои негови постапки.
„Сепак, Петар знае да ги признае своите грешки и да се покае, без да падне во обесхрабрување и без да отстапи од својата мисија да го навестува Евангелието и да го собира Христовото стадо, дури до мачеништво, што го претрпе овде во Рим, недалеку од местото каде што сме собрани“, рече папата Лав.
Петар, предложи Папата, на крајот ја прифатил мисијата што Господ му ја доверил, со Негова помош да го слуша гласот на секој човек, да ги распознава вдахновенијата, да го покаѓува патот, да ги исправува грешките, да поучува, охрабрува, поттикнува и придружува, за браќата и сестрите, послушни на дејствувањето на истиот Дух, да соработуваат во спасението едни на други и на целото човештво.
Примерот на Петар, рече тој, е повик до секој христијанин да стане градител на единството, ставајќи Го Бога во центарот на својот живот и приближувајќи се до своите браќа и сестри, внимателен кон нивните околности и потреби, за да научиме да живееме едни со други во љубов и пораката да може целосно да биде навестена.
Бог го придоби срцето на младиот Савле
„Ова“, продолжи папата Лав, „е и поуката на Павле, другиот голем апостол што денес го славиме и неуморен гласник на Радосната вест.“
Бог, рече Папата, направил нешто прекрасно во срцето на младиот Савле. Го придобил, најнапред го довел до обраќање кон Евангелието и му дал ново име, а потоа го испратил да го навестува низ целиот свет.
Како и Петар, потсети Светиот Отец, Павле сведочел за Евангелието до крај, дарувајќи го својот живот токму во овој град.
„Апостолот на народите дозволи да биде преобразен од силата на Божјото слово, кое го избави од патот на насилството и го поведе по патот на љубовта“, рече Папата.
Папата Лав потсети дека свети Августин, размислувајќи за обраќањето и мисијата на Павле, забележал дека Бог го зел прогонителот на Црквата и го направил гласник на мирот, простувајќи му ги сите гревови и поставувајќи го во служба преку која можел да им ги простува гревовите на другите.
На новите надбискупи им се доверуваат јагнињата од Господовото стадо
Гледајќи кон овие светци, рече папата Лав, можеме да научиме како да го промовираме единството и да ѝ служиме на вистината во љубовта.
Папата потсети дека во тој дух се прославува древниот и трогателен обред на доделување на палиумите на митрополитските надбискупи.
„Овие ленти од бела волна, украсени со крстови, навистина ја изразуваат посветеноста на секој пастир, но и на секој христијанин, да ги земе на своите рамена браќата и сестрите што му се доверени, како јагниња од Господовото стадо, и за нив да ги жртвува својата сила, време, труд, па дури и својот живот.“
Папата Лав нагласи дека во срцето на ова самодарување стои желбата Евангелието да стигне до сите, а целиот свет во него да најде хармонија и слога.
Со овие чувства, Папата радосно упати срдечен поздрав и до членовите на делегацијата на Вселенската патријаршија од Константинопол, кои беа присутни на празнувањето.
Нека светите Петар и Павле нè поддржат на патот по стапките на Спасителот
На крајот, Светиот Отец повика да се молиме на светите Петар и Павле да нè поддржат на нашиот пат на заедништво по стапките на Спасителот.
Тоа, заклучи папата Лав, е патот што Господ го поставил пред нас, истото она за што Му се молел на Отецот на Последната вечера и целта кон која нè научил да стремиме со доверлива надеж.
Ватикан њуз/к.мк
