Во Кастел Гандолфо, по молитвата Ангел Господов, во недела 19 јули 2026 година, папата Лав XIV истакна дека и понатаму „со загриженост ги следи настаните во различни земји ранети од војна и насилство“. Тој ги повика сите да ги соединат „своите постојани молитви“ со „великодушните напори за мир“. Папата ги поздрави и бројните ходочесници собрани на Плоштадот на слободата.
Од влезот на Апостолската палата во Кастел Гандолфо, каде што поминува период на одмор, со малку јавни настани и со неделната молитва Ангел Господов, Папата уште еднаш ја насочи својата загриженост и мисла кон многуте конфликти што сè уште го рануваат светот.
„И понатаму со загриженост ги следиме настаните во различни земји ранети од војна и насилство. Да не ги заборавиме оние што страдаат и умираат поради овие конфликти, и на великодушните напори за мир да ги придружиме нашите постојани молитви“, рече папата Лав XIV.
Извештаи за жртви во Украина и за последните напади во Иран и Кувајт
И денес пристигнаа извештаи за жртви во конфликтот во Украина. Главниот град Киев беше погоден од силен руски ракетен напад, во кој, според извештаите, загинало едно лице, а десетици биле повредени.
Во меѓувреме, украинската војска тврди дека извршила операции против руски воени цели во Црното Море и во Азовското Море.
Во исто време, беа пријавени нови американски воздушни напади во јужен Иран, по што следеше одговор од Техеран со ракети и беспилотни летала насочени кон американски воени објекти во Кувајт. Засегнат е и Ирачки Курдистан.
Вашингтон ја поврза новата офанзива со нападот од минатиот петок врз воздухопловната база Мувафак ал Салти во Јордан, во кој загинаа двајца американски војници, а трет се води како исчезнат.
Поздрав до жителите на Кастел Гандолфо и до ходочесниците
Папата Лав XIV потоа повторно ги поздрави и им се заблагодари на сите жители на Кастел Гандолфо, а топло ги поздрави и ходочесниците „од сите делови на светот“.
Посебен поздрав упати до Заедницата Ченаколо, основана од мајка Елвира, собрана во Салуцо за Празникот на животот; до Движењето на новите семејства на Движењето Фоколари, собрани на својата Меѓународна школа; до мексиканските студенти што учествуваат на Летната школа APRA; како и до групата Catholic Worldview Fellowship.
Говорејќи на англиски јазик, Папата ги поздрави и младите возрасни членови на Регнум Кристи, кои учествуваат на меѓународен курс за обука на воспитувачи, како и австралиските ходочесници што учествуваат во „The Lion Pilgrimage“, придружувани од помошниот бискуп на Сиднеј, Ентони Перси.
Ватикан њуз/к.мк
