На 26 декември 2016 на празникот на свети првомаченик Стефан во парохиската црква „Пресвето Срце Исусово“ во Битола, монс. д-р Киро Стојанов, Скопски бискуп и Апостолски егзарх во Македонија, служеше свечена божиќна Миса.
На почетокот од светата Литургија, бискупот Стојанов изрази радост и задоволство што се наоѓа меѓу верниците од Битола. Во својата хомилија бискупот Стојанов зборуваше за примерот на светиот Стефан: „Знаеше дека непријателите можат да го убијат него, но не можат да ја убијат вистината која тој ја застапува. Знаеше дека непријателството не е посилно од љубовта и неверството од верата. Затоа молеше за своите непријатели“.
Во понатамошниот дел од хомилијата, бискупот Стојанов се осврна на љубовта, како богатство и оружје на христијаните: „Сè што се случуваше со Стефан подоцна се случувало со многу христијани во долгата историја на Црквата. Во светот на насилството влегувале со љубов, простување и со вера во Бога. И додека Стефан умираше, каменуван од сите страни, воскликнува: Гледам отворено небо. Тоа е богатството и предноста, моќта и оружјето на христијаните пред секој насилник: Можеш да го уништиш мојот телесен живот, но не можеш да ја уништиш мојата вера во Христос. Не можеш да ми ја одземеш љубовта од срцето со која те љубам и помошта со која го молам Христос и на тебе да ти ја дарува како што ми ја даруваше на мене“.
к.мк
Не е дозволено преземање на оваа содржина или делови од неа за понатамошно користење во печатена, дигитална или било која друга форма на умножување без писмена дозвола од редакцијата на Католици.мк
